Universála ráhkisvuohta

Mari Boine boahtá Riddu Riđđui ealas joavkkuin. Sápmi ja Zanzibar deaivvadeaba dan bakte mii lea gait eanemus universála, namalassii ráhkisvuođa musihkkii.
Govven: Terje Ekenes Krogh

Mari Boine deaivvadeapmi Zanzibara musihkkáriiguin lei ráhkisvuohta vuosttaš geahčasteamis. Vaikko artisttat bohtet guovtti iežálágan musihkalaš máilmmis, de lei sinsiidda liikká álki gulahallat gaskaneaset. Dákkár oktavuođain bohciida magihkka, ja dan don beasat vásihit Riddu Riđus dán gease.  

Mari Boine lea juo soames háviid ovdal leamaš Riddu lávddis, ja go son dán jagi máhccá de lea olles bánda mielde ja vel lassin iežas ođđa musihkkaustibat. Jurdda dasa bođii Sigbjørn Nedlandas go son lei Zanzibaras dán dálvvi. Matona ja Rajab leaba njunnošis gaskkustit sullo árbemusihka, taaraba. Soai bargaba goappašagat oahpaheaddjin musihkkaskuvllas doppe. Soai leaba čađaproffat, aiddo seamma ládje go Mari Boine ja su joavkuge.
 
Árbevierru deaivvada árbevieruin
Árbemusihkka, taarab, lea erenoamáš musihkkastiila Afrihkás. Taarab lea Zanzibara ja India árbemusihkaid seaguhus, ja lea ožžon álggu dan áiggis go India sultána lei Zanzibara hálddašeaddjin. Sultána liikui hui sakka iežas siidariikka musihkkii, ja sáddii danin musihkkáriid Indiai oahppat dan musihkkastiilla. Go musihkkárat máhcce, de seaguhišgohte aiddo ohppon musihka zanzibarlaš árbemusihkain.
 
"Mii leat mielahis rámis go oažžut Mari Boine oktan su zanzibarlaš ustibiiddisguin Riddu Riđđui dán geasi! Dát boahtá leahtit fantásttalaš ja áidnageardán vásáhus, man it galgga eisege massit", dadjá festiválajođiheaddji Ragnhild Dalheim Eriksen.
 
Mari Boine čuojaheaddji dán jagáš Riddu Riđus leat:
Svein Schultz (bássa), Gunnar Augland (rumbbut), Roger Ludvigsen (gitárra), Herman Rundberg (perkušuvdna/worldstick/geasánas ja iežá mii), Ole Jørn Myklebust (trumpehta/xaphoon), Matona/Mohammed Issa Haji (fijuvla/oud), Rajab Suleiman (qanun)
4. mai 2010 Ragnhild Dalheim Eriksen