Skearru almmustahttin siidabánas!

Árbi lei diŋgonduodji jagi 2008 Riddu Riđđu Festivalii. Komposišuvdna lea klaveraduodji, man vuođđun leat mearrasámi sálbmašuoŋat Gáivuonas ja iežá Sámi guovlluin. Go dát duodji čuojahuvvui festiválas 2008, de lei historjjálaš ovdanbuktin. Eai goassige ovdal leat mearrasámi sálmmat komponerejuvvon dáinna lágiin, mas boares ja ođđaáigásaš šuoŋat leat ovttastahttojuvvon klaveraduodjin. Dát oktiibidjan bohciidahtii stuorra beroštumi! Dan festivála áigge Herborg čuojahii dievva viesuide, ja oaččui olbmuid čuočču speažžut gieđaidis. Vel das maŋŋáge son lea vásihan, ahte dán duodjái lea duođaige beroštupmi.

Dál lea Árbi báddejuvvon skearrun Romssa Kulturviesus, gos árvideamis lea gávpoga buoremus flygel. Báddema, teknihka ja miksema lea fuolahan Jon Marius Aareskjold, guhte lea ovttasbargan ee. dakkár stuorra namaiguin go Nils Petter Molværain, Espen Lindain ja A-hain.

CD almmustahttojuvvo dán jagás Riddu Riđđu festiválas, ja dat lea Herborga mielas hui erenoamáš.
 
- Lean sihke rámis ja giitevaš das, go Riddu Riđđu attii munnje dán vejolašvuođa guokte jagi dassá, ja danin orruge hui buorre almmustahttit mu vuosttaš soloskearru namalassii dáppe Riddu Riđus, dadjá Herborg Rundberg.

- Go dát bihttá jagi 2008 čuojahuvvui, de lei dat historjjálaš dáhpáhus, muhto dat mii dáhpáhuvvá dál lea vel eanet dehálut! Dát lea min hárvenaš árbedávvir, man Herborg lea gieđahallan stuorra gudnejahttimiin ja musikálalaš čehppodagain, muitala festiválajođiheaddji Ragnhild Dalheim Eriksen.

Skearru almmustahttojuvvo dán jagáš festiválakonseartta "Njeallje vieljaža ja okta oabbá" oktavuođas. Dát produkšuvdna lea Herborga ja su musikálalaš vieljaid oktasaš duodji. Konsearttas beassat ee. gullat bihtážiid dán ođđa CD:s. Konsearta dollojuvvo gaskavahku 21.7. ja lávvordaga 24.7.