Seminarat 2010

Govven:Tore Figenschou

 

”LUONDU VÁRUHA”- Guldalatgo mii Eadnámet eatnama?
Áigi: Bearjadat 23.07.10 bie. 15.00-17.30.
 

Báiki: Lásságámmi, Ivgubahta

Ságajođiheaddji: Anne Dalheim.

Suohkanbáhppa Kjell Skog muitala girku barggus, govt olbmot hálddašit Sivdnádusa, ja maid min risttalaš ovddasvástádusa birra. Dilálašvuođas lea vejolašvuohta ságastallamiidda ja gažaldagaide.
Dieđiheapmi čujuhussii seminar@riddu.no, eanemustá 25 oasseváldi.

Vealaheapmi Sámis – gávdnogo dat?

Áigi: Duorastat 22.07.10 bie. 12.00-14.00

Báiki: Lávddáš

Riddu Riđđu ja Norgga dásseárvo- ja vealahanáittardeaddji sávvet dán jagáš festiválas bidjat dásseárvvu ja vealaheami Sámis ságastallama vuollái. Olbmot iešguđetlágan sámi birrasiin bovdejuvvojit doallat sáhkavuoruid iežaset oaidninčiegas dán fáttá birra. Maŋŋil sáhttet dasto guldaleaddjit ovddidit gažaldagaid rabas ságastallama áigge.

Lágideapmi lea nuvttá, ja dat lea heivehuvvon bealjehemiide.

 

Nordlys-seminára

Áigi: Duorastat 22.07.10 bie. 16.00-17.45

Báiki: Lávddáš

Ságajođiheaddji: Hans-Kristian Amundsen 

 

DÁIDDASEMINÁRA 21

Áigi: Gaskavahku 21.07.10 bie. 15.00

Báiki: Lávddáš

Dán jagáš dáiddavuoruheapmi, KOLT RIDDU, álgá seminárain, man fáddán lea "Dálkkádatnuppástusat álgoálbmotčalmmiiguin". Doppe sáhttet guldaleaddjit deaivat dáiddáriid ja ságastallat, govt festiváladáiddárat ja sin duojit guoskkahallet dán fáttá.

 

Lávvordat 24.07.10 bie. 15.00

Báiki: Lásságámmi, Ivgubađas

Lávvordaga mii bovdet ođđa miniseminárii. Dán jagáš prošeavtta dáiddárat gieđahallet iežaset persovnnalaš vuogis dán fáttá. Mii jearrat maid: "Sáhttágo dáidda čalmmustahttit dálkkádatnuppástusaid čuovvumušaid – ja leatgo dán jagáš dáiddaduojit nákcen dahkat dan?" Sámi dáiddárorganisašuvnnat ja olles dáiddasuorgi erenomážit bovdejuvvo dán lágideapmái. Dieđiheapmi www.riddu.no.

 

Sesam-seminára – Sámi dutkamiid guovddáš, Romssa universitehta

Áigi: Bearjadat 23.07.10

Báiki: Nisga'a Longhouse

Ruonáeatnamis sárdnot eanebat ja eanebat ruonáeatnangiela. Muhto juos áiggoš gazzat alit oahpu de ferte maid oahppat dánskkagiela. Ivalu Søvndahl Pedersen ovddida gažaldaga: "Govt hukset beaktilis guovttegielat oahppovuogádaga?"

Barentsábi Goliat-prošeavtta bakte lea oljofitnodat Enis gulahallanoktavuođas Sámedikkiin ja davvinorgalaš riddosuohkaniin. Kristian Aambø jearrá, galgetgo álgoálbmogat geavahit dialoga mekanisman oažžun dihte kontrolla iežas resurssain.

1. juni 2010 Ragnhild Dalheim Eriksen