Sáttomeahcceblues

Tinariwen lea akta Afrihká stuorimus musihkkamenestusain 2000-logus.  Sii leat ožžon buriid árvvoštallamiid sihke Afrihkás ja iežá máilmmis, ja ánssášitge gait daid rámiid maid ožžot. Q Magazine lea ee. dadjan, ahte Tinariwen er "thrillingly unlike anything else on the planet." Ja dát duođaige doallá deaivása. Sin musihkkalaš olggosbuktin bohciidahttá miellagovaid kamelain, sáttomehciin ja sáttostoarpmain,  čoavjedánsejeddjiin, ja – vuordemeahttumit – maid New Orleanssa gáhtamusikánttain.

Sin musihka ruohttasat leat Gaska-Nuorttis ja Afrihkás, muhto blues-lágan vuollešuokŋa lea álohii dastán. Bluesa áŋggaštusain ja afrihkálaš ritmmaiguin doalvu Tinariwen du čiekŋalebbui aht' čiekŋalebbui hui iežálágan máilbmái. Muhto dat mii duođaid dahká joavkku erenoamážin lea ahte dat ásahuvvui muhtun leairras, mii gulai Gaddafi stuibmideddjiide. Musihkkárat bággehalle guođđit iežaset nomádalaš eallinvuogi, ja vuostemielain čađahit soahtebálvalusaid. Dan sivas gieđahalláge sin musihkka ollu politihkalaš diđolašvuođa, vealaheami ja iešmearridangáibádusaid. Guovllus, gos eai gávdnon telefovnnat iige doaibmi boastavuogádat, šadde sin musihkkabáttit johtilit ruohtasdási politihkalaš jietnan.

Dávjá daddjojuvvo, ahte juohke áidna tuarega Lulli-Saharas lea Tinariwena miellahttu, ja dat vuosehage man dehálaččat sii leat iežaset siidaterritorias. Áibbas nugo Riddu Riđđuge, de sii maid seaguhit kultuvrra ja politihka erenoamáš buriin vugiin. Dát galggašii leahtit doarvái geasuhit du dan jagáš Riddu Riđđui. Loahpahange danin John Lewisa (Uncut) sitáhtain:

-  A cat’s cradle of wiry funk guitar riffs played over ragged, galloping hand drums, topped by growling, ululating vocals, it seems to reunite pre-war Delta Blues with its distant African cousins -