Sámi duodji, dolla ja márkanbuvddat

Jorunn Løkvold váldá ovddasvástádusa márkaniid ovddas ja lohpida sihke dollagáfe, gáhkuid ja buori ilmmi. "Mii leat dán jagi jurddahan márkaniid festivála ilbmidahkkin, ja mii leat erenoamážit bovden vuovdáleddjiid ja čájeheddjiid dán jagáš márkaniidda," son lohká.

Márkaniidda lea leamaš stuora beroštupmi, ja eai leat šat rabas sajit. "Mii hálideimmet márkaniid gos čalmmustit giehtaduoji, sámi duoji ja dáidaga, ja báikkálaš buvttadeddjiid. Ee. áigot Venor ja Huui-nieiddat doallat buvddaid," geasuha Løkvold. Sámi čiŋat, boahkánat ja avit, liinnit, Lien ekologálaš dálu urtasat, muohtovuoiddadankursa ja einnosteapmi leat oassin das maid olbmot besset vásihit festiválaprográmma bottožiin. 

Álgoálbmotmárkanat gos leat seminárat, filmmat ja rahpan
Gaskavahku ja duorastaga besset guossit maid vásihit semináraid, filbmaprográmma, komi-álbmoga teáhtera ja iežá miellagiddavaččaid - áibbas nuvttá. Muhto kurssaide ja iežá doaimmaide ja Mátki-čájálmassii ferte oastit festiválapássa. "Dát lea joatkka diimmá álgoálgmotgilis, muhto mii lea dán jagi fáddán jurddahan eanet álgoálbmotmárkaniid go gili," lohká festiválajođiheaddji Camilla Brattland.  Ja olbmot ožžot maid mielde festivála almmolaš rahpama gaskavahku 11.7 mas sátnejođiheaddji Bjørn Inge Mo doallá dán jagáš sártni. "Dáinna mii fállat báikki olbmuide ja davviromsalaččaide erenoámaš herskko ja mii dahkat maid min iehčamet dovddusin lagásbirrasis," loahpaha festiválajođiheaddji gii sávvá gaikkaid bures boahtán Riddu Riđđui.