Rundbergat ožžo dáhki loktanit go čuojahedje Ája-lávddis

Vieljažat Håkon, Herborg, Hogne, Halvard ja Herman Rundberg adde hirbmat showa Riddu Riđu Ája-lávddis odne eahkes. Prográmmas ledje instrumentála akustalaš nuohtaid rájes gitta ruoŧŧelaš illodanlávlagiidda, repertoára maid olmmoš hárve vásiha ja mii gáibida ollu musihkalaš attáldagaid oažžut doaibmat.

Attáldatrikkes musihkkárat lonuhedje čuojanasaid hiluid háluid, vuos lei Hermanis geasanas askkis čohkkádettiin rumbbuid bálddás. Ja dat ii orron vehášge čuorbbit. Son válddii maid badjelasas Herborga flygela ovtta lávlagis, mainna Herborg lei nu čábbát čuojahan solo-bihtá.

Ja maid lávlaga Tonan fra Havet, maid Halvard lea čállán ja maid lávllui dál, válde guldaleaddjit hui bures vuostá, sálas gullui: Čábbát! Konsearttas lei ollu humora ja guldaleaddjit eai ožžon doarvái. Rundbergat bivdojuvvojedje vel aktii lávdái ja ovdanbukte dalle fas 'Sonja och Siw', ovdalgo lei áigi dáhttut áŋgiris guldaleddjiid mannat gieddái čuovvovaš konsertii.