Ođđaáiggi kulturguoddi

 Sofia Jannok lea árvvus atnon ruovttoriikas, ja lea maid ožžon buriid árvvoštallamiid olggobealde ruoŧa rájáid. Eaŋgalas The Guardian:as lei buorre máinnašeapmi su nuppi skearru birra, Áššogáttis/By the embers. Jannok lea ožžon máŋga máinnolmas bálkkašumi ja stipeandda. Earret eará Prins Eugen kulturbálkkašumi. Son lea turneren Sámis, Europas ja nuppi bealde Atlantarábi. Lagamuš maid son lea leamaš Gáivuona lei go son lávllui Barentz Jazzas Romssas 2009s. «Šaddá somá lávlut Riddu Riđđus vuosttaš háve. Festivála lea justa dalle go ruoŧa bealde Sámis lea miessemearkun, muhto birgen dan haga nu guhká go beasan Riddu lávddi alde čuožžut», dadjá Jannok.

Rustta jietna

Jannoka lávluma birra lea daddjon: «Lea dego rusta lea ožžon jiena». Árbevirolaš luđiin, urbána nuohtaiguin nu go popain ja jazzain ráhkada son áibbas erenoamáš jietnagova. Dát ollu referánssat dagahit ahte son olaha ollu guldaleddjiide. Sus lea čielga internašunála potensiála. Jannok ieš dadjá: «Olles mu eallin váikkuha mu – olbmot, deaivvadeamit, albmi, eana ja duoddarat davvin, muhto maiddá dánsunláhtti ja gávpoteallin – goitge lea sámevuohta nannoseamos».

Riddu-dovdu

Sofia Jannok ovddasta ođđa buolvva sámi musihkkariin, čiŋadan ođđaáiggi vuohkái guoddá son sámi kulturárbbi viidásat. Ii bálljo gávdno buoret kulturhálddašeaddji go son. Jannok lávlu ráhkisvuođa birra, su kultuvrralaš árbbi birra, ja daid smávva bottožiid birra mat leat luonddus vižžojuvvon. Dat ealásmahttet du fantasiijaid ja don leat fáhkkestaga su agálaš unnivearssas, seammás go máilbmi olggobealde jorrá nu go álo lea dáhkan.