Njeallje vieljaža ja okta oabbá

 Håkon (41), Herborg (35), Hogne (33), Halvard (27) ja Herman (25) Rundberg – eanetgo gaskamearalaččat musikálalaš oappážat Gáivuonas – leat guođđán musikálalaš luottaideaset miehtá Norgga, ja maid olgoriikkaide. Håkon lea musihkkár, buvttadeaddji ja musihkkaoahpaheaddji. Herborg lea musihkkár ja piánooahpaheaddji, gii ee. čálii jagi 2008 Riddu Riđđui diŋgonbarggu, man namma lei Árbi. Hogne lea musihkkár, festiválajođiheaddji ja jietnaolmmái. Halvard lea musihkkár ja prošeaktajođiheaddji, ja Herman fas musihkkár, buvttadeaddji ja komponista. Dasa lassin gaikkat čuojahit iešguđetlágan joavkkuin.

Melankoliija lapmudahttá

Rundberg oappážat lohpidit viiddis ja máŋggabealat konseartaprográmma. Das lea valjis mearrasámi čeavli, ja maid giitevašvuohta kultuvrii, guvlui ja bajásšaddamii.

– Lávlagiid válljemis vuhttojit maid min Gáivuona olggobeale eallimiid luottat. Vaikko lávlagat leatge hui iežáláganat, de goit min iešguđege persovnnalašvuođat bohtet oidnosii. Oktasaš namuheaddjin sáhttá máinnašit melankoliija; gaikkat mii sáhttit njuorastuvvat hui álkidit, boagusta Halvard.

– Gaikkat mis inspirerejit ollu guđet guoibmámet, ja mii váikkuhit sihkkarit máŋgga ládje guhtet guoibmáseamet, dovddasta Hogne.

– Musihkkárin mii leat vuosttažettiin instrumeantalisttat, muhto mánnávuođa siiddasteamet lea leamaš ollu lávlun, ja erenoamážit máŋggajienat lávlun, muitala Herborg.

– Prográmmas leat ollu čáppa teavsttat, nu lávlagiin maid olbmot dáppe dovdet, go maid min iešráhkaduvvon lávlagiin. Dat bohtet sihkkarit guoskkahit máŋgasa dovdduid, min iežamet maid.

Eatni ja áhči árbi

Ii leat soaittáhagas, ahte konsearta dollojuvvo lahka sin mánnávuođa siidda.

– Riddu Riđđu lea dahkan nu ollu minsiidda jagiid mielde, danin leage dehálaš, ahte konsearta lea aiddo fal dáppe, muitala Halvard.

Ja measta deháleamos áššin sii vásihit dán konseartta čielgá rámádussan iežaset váhnemiiddiset.

– Máŋgasat jáhkket, ahte min musikálalašvuohta boahtá dušše eatnis, muhto mii leat ožžon ollu áhčisteamet maid, muitala Halvard.

Son lohpida minsiidda hearvás eahkeda suohtas anekdohtaiguin musikálalaš bajásšaddamis Gáivuonas ja dasa gullevaš šuoŋaiguin.