Nuorra doaimmalašvuohta

 IYG – sáhttá gohčodit Riddu Riđu nurkegeađgin – ja dan ulbmil lea oažžut álgoálbmotnuoraid miehtá máilmmi čoahkkanit juogadit máhtuideaset ja árbevieruideaset. Kurssaid ja sosiálalaš ovttastallamiid bakte sii besset oahppat iežáin, ja ná hukset diđolašvuođa ja čeavlli iežaset kultuvrras.

IYG hukse fierpmádagaid geográfalaš rájiid badjel ja dáiddalaš šlájaid rastá. Čoahkkaneami loahpas nuorain lea oktasaš ovdanbuktin, man vuođđun leat kurssat, maidda sii leat oassálastán. Dán ovdanbuktima oainnát ja gulat lávvordaga suoidnemánu 24. b. bie. 19.00.

Dán jagi prográmmas leat njeallje váldooasi kurssaiguin ja bargobájiiguin:

Davvisámi luohti ja juoigganas:

Kursadoalli Issát Sámmol Hætta lea gudnejahtton juoigi Mázes/Guovdageainnus, guhte maid ráhkada ja geavaha juoigganasa. Dat lea muhtunlágan streaŋgačuojanas mainna sáhttá "juoiggahit". Kursaoasseváldit besset ráhkadit ja oahppat čuojahit dán čuojanasa, ja dieđusge maid oahppat árbevirolaš davvisámi juoigama.

Guatemala musihkka:

Oasseváldit ohppet meso-amerihkálaš kultuvrra birra árbevirolaš lávlunvugiid bakte. Sii ohppet maid ritmmalaččat atnit árbevirolaš čuojanasaid, ja goruda perkušuvnnaid čuojaheapmái. Kursadoallin leaba Carlos Chaclán ja Ranferi Aguilar.

Vepsalaš čuojanasaid ráhkadeapmi:

Riddu Riđu dán jagáš davvilaš álbmot lea vepsat, Gárjilis, Ruoššas. Sii leat dovdosat iešráhkaduvvon čuojanasaineaset, ja dán kurssas bessetge oasseváldit ráhkadit árbevirolaš njurggonasaid. Kursadoallin lea Mikhail Mihalkin.

Zanzibarlaš árbemusihkka:

Zanzibarlaš árbemusihka, taarab, lea Zanzibara ja India árbevirolaš musihkaid seaguhus. Oasseváldit ožžot oahppat lávlagiid ja lávlunvugiid.  Kursadoallin leaba Rajab Suleiman ja Matona/Mohammed Issa Haji.

Hálidat go searvat?

IYG:s leat 40 oasseváldi Sámis, Guatemalas ja Ruoššas. Riddu Riđđu ohcá dál eanet sámi nuoraid, geat siđašedje oassálastit dán jagáš IYG:i. Ohccánmearri 14. b. geassemánus. Saddes du ohccáma deike: christina@riddu.no.