Indigenous Youth Camp

Ovccát gearddi lágida Riddu Riđđu iežas nuoraidleairra álgoálbmotnuoraide festivála aktavuođas. Dán jagi fáddán lea komi-álbmoga dánsun ja musihkka, ja árbevieru mielde dieđusge maid luohti.



– IYC lea hui dehálaš luođi ceavzimii, erenoamážit go mis juohke jagi lea leamaš luohti mielde iešguđet guovllus miehtá Sámi juoiganárbevieruid lassin. Ovcci jagi áigodagas IYCas  leat máŋga nuora oahppan luođi birra ja oahppan juoigat, beassan vuosttaš gearddi juoiggastit lávddi nalde ja movttiidan ain luđiiguin bargat, muitala Lena Susanne Gaup guhte lea leamaš nuoraidleairra koordináhtor álggu rájis.

Otnábeaivvi leat luohteárbevierut árvvus nuoraid gaskkas, ja dasa leat maid Riddu Riđđu ja IYC juoigankurssainis váikkuhan positiivvalaččat. Juohke jagi lea IYCas guosseálbmot mii oahpaha sin iežaset árbevieruid, ja dán jagi dat lea komi-álbmot Ruoššas. Komiin lea rikkis musihkkaárbevierru, masa ee. gullet maŋggálágan smávva čuojanasat. Sis lea maid ealli dánsunárbevierru, ja dát šaddáge dán jagáš nuoraidleairra oassin.
 
IYCas lea sadji 30 nuorra olbmui, 15 dain sájiin leat nuoraide geat ásset sámi guovlluin. Jus dus bohciidii sáhkkiivuohta de válddes minguin aktavuođa čujuhussii lena.gaup@same.net. Dieđihanmáksu lea 750,- ja dat gokčá festiválapássa, biepmu ja orruma suoidnemánu 9. beaivvis gitta 15. beaivái.

15. May 2007 Riddu Riđđu