Dánset bohccuiguin

Simone Grøtte Pedersen ja Johanne Eltoft manaiga ealu sisa, boađusin šattai áibbas ođđa dánsennummar, mas lea juoga erenoamáš lasáhus.

Čállán: Siri Katrine Gaski / Govven: Sveinung Ryan

Go Simone Grøtte Pedersen ja Johanne Eltoft vuot aktii boahtiba Riddui, de šaddá dánge vuoru eanet go dušše musihkka – dán háve sudnos lea mielde dánsennummar Boazodánsa /Reindans. Dán guokte nuorra dánsejeaddji sáhttáge juo gohčodit Riddu-veteránan, dasgo ovdalis leaba oassálastán festiválii Åarjelhsaemien Teatere vuosehusaiguin. Dál soai goit čuožžuba – ja dánseba – iežaska julggiiguin. Na, goit measta, dasgo sudnos leat mielde muhtun ovttasbargoguoimmit: Herman Rundberg lea musihkkaovddasvástideaddji, Sveinung Ryana ja Viktor Enoksena ovddasvástádussan lea filbmen ja čuohppan, Tor Ditlevsen lea čuovgameašttir ja Trine Lise Olsen lea fas stylista.

Autenttalaš ja árbevieruguoddi
Nugo juo namma dadjá, de lea Boazodánsa ožžon inspirašuvnna boazoealus ja dan lihkademiin. Erenoamážit ealu ovttasdoaibman lea geasuhan dánsejeaddjiguovtto – vuohki govt eallit olahit mielahis leavttu, dasto seamma jođánit njeaidit fártta, ja govt dat sáhttet fáhkka jorggihit áibbas iežá guvlui. Dán vuođul soai leaba geahččalan hábmet čáppa, visuálalaš gova. Dáiddalaš geahčastagain dasa, mii dábálaččat gehččojuvvo eanet kultuvrra go dáidaga oassin, sihtaba soai gaskkustit vásáhusaideaskka gehččiide.
 
Boazodoallu adnojuvvo dávjá eanemus autenttalaš sámi kultuvrra hápmin, ja dat lea eahpitkeahttá dehálaš árbevieruid guoddi. Go ođđaáigásaš dánsen – ovttastuvvon filmmain, musihkain ja čuovgahábmemiin – boahtá mearrasámi guvlui, de soitet dát árbevierut sihke gaskkustuvvot viidáseappot ja maid hástaluvvot. Muhto go prošeavttas leat ná čeahpes dáiddárat duogábealde, de šaddá juohke dáhpáhusas gelddolaš boađusin. Ja gii diđeš; soitet maid festiválaguossit, geat arvet sisa kinosálii, beassat oassin dan energiijas mii boazoealus lea.
3. mai 2010 Ragnhild Dalheim Eriksen