Vuollegaš multitaleanta

Ii leat nu álki gávdnat rivttes sániid govvidit dán jagáš nuorra artistta. Dakkárin lea Riddu Riđđu oainnat nammadan nuorra, lihkostuvvan multitaleantta, ja multitaleanttaid birra láve dávjá leahtit ollu dadjan ládje. Mii sáhttit álgit vaikkoba dainna, ahte Niillas Holmberg debuterii mannan čavčča girječállin diktačoakkáldagainis «Dego livččen oaidnán iežan». Girjji almmustahtii Áillohačča – Nils-Aslak Valkeapää – álggahan lágádus DAT, ja dovddus sámi diktačálli Inger-Mari Aikio-Arianaick lea redigeren girjji.

Mii sáhttit joatkit dasto dainna, ahte Niillas Holmberg – ja ovttasbargoguoibmi Roope Mäenpää – vuolgiba fargga Tamperei álggahit skearrubáddema. Muhto fertet maid máinnašit, ahte son galgá vuos geargat turneremis Beaivváš-teáhtera ođđaseamos bihtáin, Allaqiin, mas Holmbergas lea oalle guovddáš rolla. Ja de loahpas, dego gait fátmmasteaddji  loahppačuokkisin, sáhttit  vel namuhit, ahte lunta ii leat vel deavdán guoktelogige.

Nuorra ja lohpideaddji

—   Lean mánnávuođa rájes juo bargan dáiddaáššiiguin. Lean bargan ollu, muhto lea mus leamaš maid lihkku ja tuvra, dadjá Holmberg ieš, guhte – vel dás ovddabealde máinnašuvvomiidda lassin – lea vuollegaš ja sympáhtalaš olmmoš.

—   Riddu Riđđu lea dehálaš dáhpáhus Sámis, das lea nana buorre beaggin. Nuorra kulturbargiide, nugo munnje, lea stuorra gudnin beassat jagi nuorra artistan. Ja ná geavvá várra dušše oktii eallimis.

Dát soaitáge sivvan dasa leahtit, ahte Holmberg áigu váldit dán dilis gait ávkki maid sáhteš: festivála áigge son áigu lohkat divttaid; girjji govat, maid Antti Väre lea sárgon, vuosehuvvojit dáiddavuosehusas; son ja Roope Mäenpää áiguba čuojahit, ja sáhttá vel šaddat juogalágan teatrálalaš ovdanbuktinge.

Ja go sus jearrá boahtteáiggi birra, de vástida nugo sámi dáiddárii heivege: — In dieđe mii leaš ovddabealde, šaddá suohtas oaidnit. Dál mun lea dás, ja manname gosa dal juo manažan.

Dat ii várra heahkastuhte geange juos gait manaš hirbmat bures, sihke Riddu Riđus, ja gait iežáin mii čuvoš das maŋás.