Biertnaid bierdna

Dán jagi boahtá jiekŋabierdna Riddu Riđu lávdái. Akta Ruonáeatnama nuoramus ja beakkáneamos bánddain vuoseha dutnje dán áigge ruonáeatnanlaš kultuvrra.

Čállán: Kai Arne Ulriksen
Nanook, mii máksá biertnaid biertna, almmustahtii vuosttaš skearrus diimmá skábmamánu, ja šattaige jođánit aktan bivnnuheamos joavkkuin Ruonáeatnamis. Joavku čuojaha muhtunlágan molssaevttolaš rocka, mas vuhtto ruonáeatnanlaš kultuvra. Nanooka njunuš, Fredrik Elsner, dadjá iežaset geahččalan ráhkadit áibbas ođđa šlája ruonáeatnanlaš musihkkii. Dan dovdomearkan leat ođđaskáhppojeaddji nyánssat, maid hárve gávdná iežá ruonáeatnanlaš musihkas.
 
Čeargu jiekŋabiertna govva joavkku skearru olggožis ii leat soaittáhagas válljejuvvon. Bándda namma lea dieđinge aktan sivvan dasa, muhto dálkkádatrievdamiid geažil ellet jiekŋabiertnat hui váttes dilis. Joavkku lahtut sihtet gova bakte gohccáhit olbmuid jurdagiid, ja dainna lágiin fuobmát maid jiekŋabierdna lea máksán sin kultuvrii, ja nu maid árvvoštallat jiekŋabiertna dálá diliid. Skearru nammabihtás ”Seqinitta Qinngorpaatit” – sámegillii ”Min beaivváš báitá dutnje”– lea danin eanet go akta mearkkašupmi. Joavku sihtá dáinna lávlagiin čujuhit lassánan lieggasii, mii dagaha váttisvuođaid jiekŋabiertnaide johtit ja bivdit jieŋa nalde.
 
Nanook lávlu aivvenassii ruonáeatnangillii, ja beare dat galggašii leahtit doarvái oažžut du boahtit Riddogieddái dán jagi. Mii lohpidit sihke rocka ja šuoŋalaš lávlagiid, mat ožžot guolggaid ceagganit; guolggaid mat it oppa diehtánge iežat rupmašis leahtit. Sii máŋgga ládje dahket ođđaáigge ruonáeatnanlaš kultuvrra konkrehtalažžan.
Dalle leage dušše akta sátni vel dadjan ládje: Tikilluarit – Buresboahtin!
6. april 2010 Ragnhild Dalheim Eriksen