Ambient Techno Chant

Vuot oktii čuožžu okta legeanda Riddu Riđu lávddis. Wimme Saari lea álbmogiidgaskasaččat dovddus sápmelaš juoigi. Iežas erenoamáš ovdanbuktinvuogi ánssus son adnojuvvo bálggesčuollin mii boahtá sámi musihkkii.

Juo 15-jahkásažžan oahpai Wimme juoigama čiegusvuođaid, ja vuosttaš skearru, Wimme, ovddas son oaččui dan jagi álbmotskearrobálkkašumi Suomas. Guhtta jagi lei juo gollan su maŋimuš skearrus, muhto dál son viimmát lea fas ruovttoluotta skearruinis Mun. Dán skearrus orru Wimme juoigan gievrrat go goassige ovdal. Lagaš oktiičuodjan čuojaheddjiiguin guoddá luođi ovddos guvlui, ja oažžu juoigi geahččalit buot buoremusa maid máhteš.

Wimme lea bargan ovttas máŋggain artisttain, ja jagi 2005 son turnerii Englánddas  bihtáin Shaman Voices, fárrolagaid kanadalaš Tanya Taqagiin ja kalmuhkalaš čottalávluin Okna Tsahan Zamiin. Son lea ráhkadan musihka ee. Beaivváš Sámi Teáhtera bihttái 1852, ja maid máŋgga sámi filbmii; merihttalistu lea guhkki. Jagi 2009 dát stuorra juoigi oaččui iežas filmma, go suomabeale rešissevra Juha Iisak Koivisto buvttadii 30 minuhta guhkkosaš dokumentára Wimme.

Luođi váldoiešvuohta

Wimme lea áiggiid mielde hábmen jietnagova, mas ii sáhte feillet. Su jienas lea  issoras viiddes register, ja dan vehkiin son ovttastahttá árbevirolaš luođi ođđaáigásaš improvisašuvnnaide. Su jietna sáhttá jođašit čielga melodiijalaš šuokŋabálgás áibbašeaddji falsehttii, ovdalgo dat fáhkkestaga nuppástuvvá nu seavdnjadin ja čieŋalin, ahte dat orru boahtime helveha čiekŋaleamos čiegain. Go dán dasto mieđušta jazzain, rockain ja elektronikain, de lokte Wimme luođi áibbas ođđa dássái, muhto liikká bissu árbevirolaš luohti ainge su musihka geađgejuolgin. Nappo lea son gávdnan váldoiešvuođa boares juoiganvuogis: "Munnje luohti mearkkaša buoremus vuogi buktit ovdan dovdduidan ja iežan duogážan. Dat riggudahttá mu."

Riddu Riđđu lea hui duhtavaš oažžut Wimme ruoktot Riddu-lávdái. Dás šaddá dakkár konsearta, maid it siđaše massit. 

11. June 2010 Ragnhild Dalheim Eriksen